ЭРҮҮЛ МЭНДИЙН ХЯНАЛТЫН ЧИГЛЭЛЭЭР

0
165

Асуулт 1:Эрүүл мэндийн ямар тусламж үйлчилгээ нь төлбөртэй байдаг вэ?

Хариулт: Эрүүл мэндийн сайдын 2006 оны 277 тоот тушаалд заасны дагуу эрүүл мэндийн дараах тусламж үйлчилгээ нь үнэ төлбөртэй байна. Үүнд:

Нэг. Амбулаторийн оношлогоо, шинжилгээ

  • Цөмийн оношлогоо
  • Компьютер томографийн оношлогоо
  • Зүрхний цахилгаан бичлэг
  • Тархины цахилгаан бичлэг
  • Дурангийн оношлогоо
  • Хэвлийн хөндийн цуллаг эрхтнээс бусад эрхтний чанд авианы оношлогоо
  • Рентген зураг авалт. /флюраграфаас бусад/
  • Доплер хэт авиан оношлогоо
  • Бактерологийн шинжилгээ
  • Имуннологийн шинжилгээ
  • Цитологи, гистологийн шинжилгээ
  • Эмчилгээний гоо сайхны оношлогоо
  • Ажил, сургуульд орох, жолооны үнэмлэх авах болон гадаадад явахад шаардагдах эрүүл мэндийн үзлэг шинжилгээ

Хоёр. Амбулаторийн эмчилгээ.

  • Цөмийн эмчилгээ
  • Насанд хүрэгчдийн шүдний эмчилгээ, протез, гажиг засал
  • Нүдний хараа заслын лазерийн эмчилгээ
  • Гоо заслын эмчилгээ
  • Сайн дурын вакцинжуулалт
  • Хиймэл үр суулгах ажилбар
  • Үр хөндөх

Гурав.Бусад.

  • Мэс засалд хэрэглэгдэх хиймэл үе холбоос , нөхөөс, үе бэхлэгч, судасны ханын пейсмейкер хиймэл яс, шөрмөс, судас
  • Дурангийн мэс заслын эмчилгээнд хэрэглэгдэх нэг удаагийн цоолтуур, хавчаар, эрхтэн таслах багаж
  • Бөөрний архаг дутагдалтай өвчтөний диализид хэрэглэх шүүлтүүр
  • Бусад протез
  • Донтолт архидалтаас шалтгаалсан гэмтэл, хордлогын оношлогоо, эмчилгээ
  • Иргэн санаатайгаар амь насаа бусниулахаар оролдсон тохиолдлын оношлогоо эмчилгээ
  • Эрүүл мэндийн даатгалгүй иргэний ЭМД-аас санхүүждэг бүх төрлийн оношлогоо эмчилгээ.

 Асуулт 2 : Өрхийн эмч нярай хүүхдийг сард хэдэн удаа үзэх ёстой вэ?

Хариулт: Өрхийн эмнэлгийн стандартад заасны дагуу өрхийн эмч нярай хүүхдийг0-2 сартайд нь 7 хоног тутам, 2-12 сартайд нь сар тутам үзэж зөвлөгөө өгнө

Асуулт 3 : Жирэмсэн эмэгтэйчүүд хэдэн сартайдаа хяналтанд орох ёстой вэ?

Хариулт: Жирэмсэн эмэгтэйчүүд жирэмсний эхний 3 сартайд өөрийн харъяа өрхийн эмнэлгийн эмчийн хяналтанд орох ёстой.

Асуулт 4: Хувийн эмнэлэг нээж ажиллуулах тухай хүсэлтээ хаана ямар байгууллагад гаргах вэ?

Хариулт: Та хувийн эмнэлэг нээж ажиллуулах хүсэлтэй байгаа тухай өргөдөлөө холбогдох бусад баримт бичгийн хамт эрүүл мэндийн газрын дэргэдэх тусгай зөвшөөрлийн комисст гаргах бөгөөд уг комисс таны хүсэлтийг өргөдөл хүлээн авсанаас хойш 30 хоногийн дотор шийдвэрлэнэ.

Асуулт 5: Эмч эмнэлгийн ажилтнууд нь хуулиар олгогдсон ямар нийгмийн баталгаагаар хангагдах вэ?

Хариулт: Эмнэлгийн мэргэжилтэн нь Эрүүл мэндийн тухай хуульд заасны дагуу дараах нийгмийн баталгаагаар хангагдана. Үүнд:

  1. Төрийн өмчийн эрүүл мэндийн болон боловсролын байгууллагад 25 ба түүнээс дээш жил ажилласан эмнэлгийн мэргэжилтэн тэтгэвэрт гарахад 24 сарын, эрүүл мэндийн бусад ажилтан тэтгэвэрт гарахад 12 сарын, өрхийн эрүүл мэндийн төв, сум, тосгоны эрүүл мэндийн төв, сум дундын эмнэлэгт 10 ба түүнээс дээш жил ажилласан эмнэлгийн мэргэжилтэн тэтгэвэрт гарахад 36 сарын, эрүүл мэндийн бусад ажилтан тэтгэвэрт гарахад 18 сарын үндсэн цалинтай тэнцэх хэмжээний нэг удаагийн мөнгөн тэтгэмжийг тэтгэвэрт гарах үед авч байсан үндсэн цалингаас нь тооцон ажиллаж байгаа байгууллагаасаа авах эрхтэй
  2. Өрхийн болон сум, тосгоны эрүүл мэндийн төв, сум дундын эмнэлэгт ажиллаж байгаа эмнэлгийн мэргэжилтэнд 3 жил тутамд нэг удаа 6 сарын, аймгийн Нэгдсэн эмнэлэг, бүсийн оношлогоо, эмчилгээний төвд ажиллаж байгаа эмнэлгийн мэргэжилтэнд 5 жил тутамд 6 сарын үндсэн цалинтай тэнцэх хэмжээний мөнгөн тэтгэмжийг ажиллаж байгаа байгууллагаас нь олгоно.
  3. Эрүүл мэндийн ажилтныг жилд нэг удаа эрүүл мэндийн үзлэг, шинжилгээнд төлбөргүй хамруулна
  4. Эрүүл мэндийн ажилтанд ажилласан 5 жил тутамд нь Хөдөлмөрийн тухай хуулиар тогтоосон ээлжийн амралтын үндсэн болон нэмэгдэл амралт дээр нь 1 өдрийн нэмэгдэл амралт олгоно
  5. Сум, тосгоны эрүүл мэндийн төв, багийн эмчийн салбарт 5 ба түүнээс дээш жил ажиллаж байгаа эмнэлгийн мэргэжилтнийг мэргэжил дээшлүүлэх сургалтад 5 жил тутамд улсын зардлаар хамруулна.

Санал, сэтгэгдэл үлдээх хэсэг

Энд сэтгэгдэлээ бичнэ үү
Та нэрээ энэ хэсэгт бичнэ үү